Klækjaklóin...verðtryggingin

Fjármálaútreikningatölur í kolli mínum, sem ég virðist seint ætla að skilja eða bara alls ekki..

 

Hagfræðikerfiskenningalærdómsútreikningur talna sem stjórna lífi okkur, snilldar - úrlausn, eitt af mannanna verkum og stjórnað og stýrt af örfáum útvöldum manneskjum...

Og við auðmjúkur almúgurinn fylgir reglugerðinni samviskusamlega eftir...

Nokkur orð mín úr fyrri bloggskrifum;

Tölur og útreikningar "snilldarlausn sem ráðamenn þjóðarinnar hafa að leiðarljósi og hagkerfið "góða" byggist á. Blekking, sem er leikur að tölum frambærilegar á hvítu blaði. Þeir ríku verða ríkari og þeir fátæku fátækari.

Hættum að týnast í orðaskrúði ólgandi hafi, talna og orða, sem stjórna hér öllu enn...

" nafnávöxtun, meðalraunávöxtun, raunávöxtun, allrahanda  ávöxtun, verðtrygging, vaxtakjör, greiðslubyrði, endurfjármögnun, uppgreiðslukosnaður, greiðslustaða, stimpilgjöld, fjármagnskosnaður, vísitölutrygging, vísitöluhækkun-lækkun, eignarstýring, fjárfesting í sjóðum, fjármálamarkaðir, áhættuþol, áhættustýringasvið, innherjar, fruminnherjar, gengisþróun "...og áfram mætti telja...

já og erfitt er að reyna að útskýra fyrir ungviðinu, um hvað allt þetta snýst.

Þetta eru allt mannanna verk og þá væntanlega einhverju hægt að breyta og bæta skildi maður ætla...!!!

Hvað er svo t.d. svo erfitt við að koma verðtryggingunni margumtöluðu á braut fyrir full og allt ?

Hverjir hafa þar hagsmuna að gæta ? Hverjir græða og hverjir tapa ?

Hún er allavega ekki til heilla almennings !

Viðvera hennar átti víst að vera hér um skamman tíma, en eitthvað viðheldur hennar líftíma.

Þurfun að komast að því hvað, eða hverjir halda dularhjúp um hana

Erum við ekki eina landið með þessa klækjakló ?

Förum nú að vakna og stjórnum og stýrum öllu þessu kerfi okkar á einfaldari og raunsærri hátt...

Hvernig væri t.d. litlu úthverfi í milljónaborg stjórnað ? Ábyggilega þyrfti ekki svo margt fólk og þunglamalegar stofnanir, sem hér eru við stjórnvölinn, hjá okkur fyrir rúmlega 300.000 manns !

Afhverju getum við t.d. ekki stuðlað að;

Lægri sköttum, hærri skattleysismörkum, tekjutengingar í burt, verðtryggingjuna í burt, lægri almenna vexti á lánum. Fjármagn út í atvinnulífið - t.d. frá lífeyrissjóðunum. Við VERÐUM að fara að koma hjólum lífs - atvinnu - og afkomu af stað.

Ég er farin að halda að ráðamenn geri sér ekki alveg grein fyrir alvarleika margra í þjóðfélaginu. 

Og í einfaldleika mínum, hef ég heldur ekki skilið allar þessar hækkanir hjá blessuðum ráðamönnunum síðasta árið á hinum ýmsu sviðum í gegnum þessa útreikninga sína.

Sem felast finnst mér í því að vega enn meir að almenningi ásamt að draga úr þreki, þor og dug...

Byrðarnar eru orðnar þyngri en nokkurn óraði fyrir. Erfitt er fyrir okkur almúgann að halda þak yfir höfuðið og eiga fyrir salti í grautinn og skuldirnar halda einungis áfram að hlaðast upp.

Og tökum nú saman höndum á laugardaginn og segjum nei við icesave ( iceslave )

Kannski magnast þá orka og vængast hugur og dugur til að fara taka almennilega til hér í þessu þjóðfélagi, halda áfram tiltekt og ekki gleyma hinu minnsta skúmaskoti í þrifunum og byrjum að reka það eins og hjá stórri þrifalegri og hagsýnni fjölskyldu og látum ekki erlend öfl trufla þrifin.

 josira

( p.s. arg og garg... var búin að skrifa hér sprækan pistil og síðustu orðin voru að detta fram í fingurgómana þegar eins og hendi væri veifað, allt var á bak og burt....arg og ekki í fyrsta skipti... Já ég veit...maður á að save af og til , en þegar orðin eru að renna í gegnum hugann þá man maður ei eftir því ...Var á báðum áttum að byrja aftur, lét mig hafa og stikla hér á einhverjum orðum, takið viljann fyrir verkið.. )

Meinsemd hve verðtrygging er fyrirferðarmikil

Athugasemdir

[Gísli Ingvarsson, 4.3.2010 kl. 15:56]

Þar sem ég er alveg sammála þér að verðtrygging er svikamylla þá sé ég ekki hvað það kemur kosningunum við á laugardaginn.

Er það svo að á laugardaginn getur maður kosið nei við öllu sem maður er ósammála?

Þetta hlýtur að vera óskastundin upprunnin.

[josira, 4.3.2010 kl. 18:35]

 Þakka þér fyrir innlitið og orð þín, Gísli. Ég hugsa að allflestir séu sammála um að verðtrygginguna þarf að skoða að nýju alveg ofan í neðsta lag og afnema hana sem allra fyrst... Yrði það eflaust hin besta kjarabót...

Og hvað varðar orð mín um icesave kosninguna á laugardag í sama pisli og um klækjaklónna, þá einfaldlega hugsaði ég ekkert  sérstaklega, um hvort sú setning ætti við eður ei. Oft veð ég úr einu í annað í skrifum mínum. En þakka þér fyrir að benda mér á þetta.

Reyni að halda mig við þau orð sem eiga við ath. pistil hverju sinni

Ícesave orðin flutu svona með, því ég var örlítið að hugsa um þennan, að mörgu leyti merka dag, sem rennur upp þann 6 mars. Og ætlaði mér nú ekkert að fara skrifa neina grein eða pistil um það sérstaklega. Bara minna á hann svona í leiðinni.

Lífið leikur meir, en að í einu svari felist allar lausnir. 

Óskastundin mín n.k. laugardag 6 mars hefði verið sú, að faðir (stjúpi) minn til rúmlega 40 ára hefði auðnast að ná 67 ára aldurs- afmælisdeginum sínum þennan dag og að icesave reikningarnir hefðu aldrei verið til, þá liti nú lífið aðeins öðruvísi út.

En svona er lífið, enginn ræður alveg för og ætli það sé ekki svo að ...

 " Erfiðleikar eru til að læra af "    og

 " Vandamálin eru til að leysa þau "